LUNGSOD NG NAGA — Opisyal nang nailipat sa Bicol State College of Applied Sciences and Technology (BISCAST) ang buong pagmamay-ari ng Metro Naga Food Processing Hub Shared Service Facility mula sa Department of Trade and Industry (DTI).
Pinangunahan nina DTI Region V Regional Director Dindo G. Nabol at DTI Camarines Sur Provincial Director Jay Percival S. Ablan ang paggawad sa BISCAST ng plaque para sa transfer of ownership noong Hulyo 30, 2026, sa Feria de Camarines featuring UMA Usbong 2026, na ginanap sa Atrium ng Robinsons Place Naga.
Kinilala sa plaque ang BISCAST bilang cooperator matapos nitong matugunan ang mga kinakailangan para sa ganap na paglilipat ng pagmamay-ari ng Shared Service Facility sa ilalim ng DTI Department Order No. 24-129, o Revised Guidelines for the Implementation of the Shared Service Facilities Project.
Tinanggap ang pagkilala nina SUC President II Prof. Charlie P. Nacario, PhD; Vice President for Academic Affairs Dr. Apolonia C. Sebello; REPED Director Prof. Ana Sheryl Lynn S. Catura; Lead Proponent Dr. Ana Marie Aquino Binalla; Institutional Production and Enterprise Development Coordinator Ms. Rachelle A. Esguerra; at Metro Naga Food Processing Hub Manager Mr. Joriel Cereza.
Sa ganap na paglilipat ng pasilidad sa BISCAST, higit na napagtitibay ang pakikipagtulungan nito sa DTI sa pagsusulong ng food processing, kabuhayan, at pagnenegosyo sa pamamagitan ng teknikal na pagsasanay ng mga mag-aaral at pagpapalawak ng mga oportunidad na makapag-ambag sa pag-unlad ng mga lokal na komunidad.
Better, brighter, boundless BISCAST!
